| تبليغات | X |
 |
 |
|
| ما به توسعه عمران و آبادانی نگین ایران زمین(خوی)مي انديشيم..محتاج همراهی و همتتان هستیم |
|
حیدر بابا ایلدریملار شاخاندا، سللر ، سولار شاقیلدایوب آخاندا، قیز لار اونا صف باغلیوب باخاندا. سلام اولسون شوکتوزه ، ائلوزه منیم ده بیر آدیم گلسین دیلوزه. حیدر بابا، کهلیکلرون اوچاندا کول دیبینن دوشان قالخوب، قاچاندا ، باخچالارون چیچکلنوب آچاندا، بیزدن ده بیر ممکن اولسا، یاد اله آچیلمیان اورکلری شاد اله. بایرام یئلی چارداخلاری ییخاندا، نوروز گلی، قار چیچگی چیخاندا، آغ بولوتلار کوینکلرین سیخاندا بیزدن ده بیر یاد ایلیه ن ساغ اولسون درد لریمیز قوی دیکلسون داغ اولسون. حیدر بابا، گون دالیوی داغلاسین اوزون گولسون، بولاخلارون آغلاسین اوشاخلارون بیر بیر دسته گل باغلاسین یئل گلنده وئر گتیرسین بویانا بلکه منیم یاتمیش بختیم اویانا حیدر بابا، سنون اوزون آغ اولسون! دورت بیر یانون بولاغ اولسون باغ اولسون! بیزدن سونرا سنون باشون ساغ اولسون! دنیا قضوـ قدر، ئلوم-ایتیمدی! دنیا بویی اوغولسوزدی، یتیمدی! حیدر بابا،یولوم سنن کج اولدی، عمروم کچدی، گلممه دیم گج اولدی، هئچ بیلمدیم گوزللرون نئج اولدی بیلمزدیم دنگه لروار، دونوم وار، ایتگین لیک وار، آیرلیق وار، ئولوم وار. حیدر بابا، ایگیت امک ایتیرمز، عمر کچه ر، افسوس بره بیتیرمز، نامرد اولان عمری باشا یتیرمز. بیزده، واللاه، اونوتماریق سیزلری، گورممسک حلال ائدون بیزلری. حیدی بابا، میر اژدر سسلننده، کند ایچینه سسدن ـ کویدن دوشنده، عاشیق رستم، سازین دیللندیرنده، یادوندادی نه هولسک قاچاردیم؟ قوشلار تکین قاناد چالیب اوچاردیم؟ شنگل آوا یوردی عاشیق آلماسی، گاه دا گئدوب اوردا قوناق قالماسی، داش آتماسی،آلما، هیوا سالماسی، قالیب شیرین یوخی کیمی یادیمدا. اثر قویوب روحیمدا ، هر زادیمدا. حیدر بابا، قوری گولون قازلاری، گدیکلرون سازاخ چالان سازلاری، کت ـ کوشنین پاییز لاری، یازلاری، بیر سینما پرده سی در گوزومده، تک اوتوروب، سیر ائدیرم ئوزومده. حیدر بابا، قره چمن جادا سی، چووشلارین گله ر سسی ـ صدا سی، کربلیا گئدنلرین قادا سی دوشسون بو آج یولسوز لارین گوزونه، تمدنون اویدوخ یالان سوزونه ! حیدر بابا ، شیطان بیزی آزدیریب، محبتی اورکلردن قازدیریب، قره گونون سرنوشتین یازدیریب، سالیب خلقی بیرـ بیرینون جانینا! باریشیغی بلشدیروب قانینا! گوز یاشینا باخان اولسا، قان آخماز! انسان اولان خنجر بئلینه تاخماز! اما حیف، کور توتدوغون بوراخماز! بهشتمیز جهنم الماقدا در! ذیحجه میز محرم الماقدا در! خزان یئلی یارپاخلاری توکنده بولوت داغدان ینیب کنده چوکنده. شیخ الاسلام گوزل سسین چکنده نسگلی سوز اورکلره دیردی، آغاشلاردا آللاها باش ایردی. داشلی بولاخ داش ـ قومونان دولماسین! باخچالاری سارالماسین، سولماسین! اوردان کچن آتلی سوسوز اولماسین! دینه بولاخ، خیرون اولسون آخارسان ، افقلره خمار ـ خمار باخارسان! حیدر بابا ، داغین داشین سره سی، کهلیک اوخور ، دالیسیندا فره سی . قوزولارین آغی ، بوزی، قره سی. بیر گئدیدیم داغ دره لر اوزونی، اوخوییدیم، ((چوبان ، قیتر قوزونی))، حیدر بابا سولی یرین دوزنده ، بولاخ قینر چای ـ چمنین گوزونده، بولاغ اوتی ، اوزه ر سویون اوزونده، گوزل قوشلار اوردان گلیب گچللر، خلوتلیوب ، بولاخدان سو ایچللر . بیچین اوستی ، سنبل بیچن اوراخلار، ایله بیل که زلفی دارار داراخلار، شکار چیلار بیلدیرچینی سوراخلار، بیچین چیلر آیرانلارین ایچللر، بیر هوشلانیب، سوندان دوروب بیچللر. حیدر بابا ، کندین گونی باتاندا ، اوشاقلارون شامین ییوب یاتاندا ، آی بولوتدان چیخوب قاش ـ گوز آتاندا! بیز دن بیر سن اولارا قصه ده ، قصه میزده چوخلی غم و غصه ده. قاری ننه گئجه ناغیل دینده ، کولک قالخیب ، قاب ـ باجانی دوینده، قورد گئچنین شنگلیسین یینده، من قاییدیب ، بیرده اوشاق اولیدیم! بیر گل آچیب ، اوندان سورا سولیدیم! عمه جانین، بال بلله سین ییه ردیم ، سوندان دوروب،اوس دونومی گییه ردیم ، باخچالاردا تیرینگنی دییه ردیم ، آی ئوزومی او ازدیرن گونلریم! آغاج مینوب ، آت گزدیرن گونلریم! هچی خالا چایدا پالتار یوواردی، ممد صادق داملارینی سوواردی، هیچ بیلمزدیک داغدی، داشدی،دوواردی هریان گلدی، شیلاغ آتوب آشاردیق، آلله، نه خوش، غمسیزـ غمسیزیاشاردیق! شیخ الاسلام، مناجاتی دییه ردی ، مشد رحیم لباده نی گییه ردی، مشد آجلی بوز باشلاری ییه ردی، بیز خوشودوق خیرات اولسون، توی اولسون، فرق ایله مز ، هر نولاجاق ، قوی اولسون! ملک نیاز ورندلین سالاری، آتین چاپوپ، قیقاجیدان چالاردی، قیرقی تکین، گدیک باشین آلاردی، دولائیا قیزلار آچیپ پنجره، پنجره لرده نه گوزل منظره! حیدر بابا، کندین تویون توتاندا ، قیزـ گلینلر حنا ، پیلته ساتاندا ، بیک گلینه دامنان آلما آتاندا ، منیم ده او قیزلاروندا گوزوم وار ، عاشیقلارین سازلاریندا سوزوم وار. حیدر بابا، بولاخلارین یار پیزی ، بوستانلارین گلبسری ، قارپیزی ، چر چیلرین آغ نباتی ، ساققیزی ، ایندی ده وار داماغیمدا ، داد وره ر . ایتگین گئدن گونلریمدن یاذ وره ر. بایرامیدی ، گئجه قوشی اوخوردی ، آداخلی قیز بیک جورابین توخوردی ، هر کس شالین بیر باجادان سوخوردی ، آی نه گوزل قایدادی شال ساللاماق! بیک شالینا بایراملغین باغلاماق! شال ایسته دیم ، من ده ائو ده آغلادیم ، بیر شال آلیب ، تئز بئلیمه باغلادیم ، غلام گیله قاشدیم ، شالی ساللادیم ، فاطمه خالا ، منه جوراب باغلادی ، خان ننه می ، یادا سالیب آغلادی ! حیدر بابا ، میرز ممدین باخچاسی ، باخچالارین تورشاـ شیرین آلچاسی ، گلینلرین دوزمه لری ، طاخچاسی هی دوزولور گوزلریمین رفینده! خیمه وورار خاطره لر صفینده! بایرام اولوب ، قیزیل پالچیق ازللر ، ناقیش ووروب ، اتاقلاری بزللر ، طاخچالارا دوزمه لری دوزللر ، قیزـ گلینن فندقچاسی ، حناسی ، هوسلنه ر آناسی ، قایناناسی . باکی چنین سوزی ، سووی ، کاغذی ، اینکلرین بولاماسی ، آغزی ، چرشنبه نین گردکانی ، مویزی ، قیزلار دییه ر: آتیل ـ باتیل چرشنبه ، آینا تکین بختیم آچیل چرشنبه! یومورتانی ، گویچک ، گولی ، بویاردیق ، چاقیشدیریب، سینانلاری سویاردیق، اویناماقدان بیر جه مگر دویاردیق؟ علی منه یاشیل آشیق وئرردی! ارضا منه نوروز گلی درردی! نوروز علی خرمنده ول سورردی ، گاهدان ینوب ، کولشلری کورردی، داغدان دا بیر چوبان ایتی هورردی، اوندا گوردون الاخ ایاخ ساخلادی، داغا باخیب، قولاخلارین شاخلادی! آخشام باشی ناخیریلان گلنده، قودوخلاری چکیب، وواردیق بنده، ناخیر گچیب ـ گئدیب یتنده کنده ، حیوانلاری چلپاق مینوب قوواردیق ، سوز چیخسیدی، سینه گریب سوواردیق، یاز گئجه سی چایدا سولار شاریلدار، داش ـ قیه لر سلده آشیب ، خاریلدار، قارانلیقدا قوردون گوزی پاریلدا لر، ایتلر، گوردون، قوردی سئچوب، اولاشدی، قورددا ،گوردون، قالخیب، گدیکدن آشدی. قیش گئجه سی ، طوله لرین اتاغی، کتلیلرین اوتراغی ، یاتاغی ، بخاریدا یانار اوتون یاناغی، شبچره سی، گردکانی ، ایده سی ، کنده باسار گولوب ، دانشماق سسی. شجاع خال اغلونون باکی سوقتی ، دامدا قوران سماوری، صحبتی، یادیمدادی شسلی قدی ـ قامتی. جونم مگون تویی دونوب، یاس اولدی ، ننه قیزین بخت آیناسی کاس اولدی. حیدربابا، ننه قیزین گوزلری، رخشنده نین شیرین ـ شیرین سوزلری ، ترکی دئدیم ، اوخوسونلار ئوزلری ، بیلسینلر که ، آدام گئدر آد قالار، یاخشی ـ پیسدن آغیز دا بیر داد قالار. یاز قاباغی، گون گونئی دوینده، کند اوشاغی قار گولله سین سوینده، کورکچیلر داغدا کورک زوینده ، منیم روحوم ایله بیلون اوردا دور ، کهلیک کمین باتیب، قالیب قاردادور. قاری ننه اوزاداندا ایشینی ، گون بولوتدا ایرردی تشینی، قورد قوجالیب، چکدیرنده دیشینی، سوری قالخیب، دولائیدان آشاردی بایدا لارین سوتی آشیب ـ داشاردی. خجه سلطان عمه دیشین قیساردی ملا باقر عمو اوغلی تئز میساردی. تندیر یانیب، توستی ائوی باساردی. چایدا نمیز ارسین اوسته قایناردی، قوورقامیز ساز ایچینده اویناردی. بستان پوزوب، گتیریردیک آشاغی، دولدوریردیق ائوده تاختاـ طاباغی، تندیر لرده پیشرردیک قاباغی، ئوزون ییوب، تخملارین چیتداردیق، چوخ یمکدن، لاپ آز قالا چاتداردیق. ورزغاننان آرموت ساتان گلنده، اوشاقلارین سسی دوشردی کنده، بیزده بویاننان اشیدیب بیلنده شیللاق آتیب، بیر قیشقریق سالاردیق، بوغدا وئریب، آرموتلارین آلاردیق. میرزا تاغی نان گئجه گتدیک چایا. من باخیرام سلده بوغولموش آیا! بیردن ایشیق دوشدی اوتای باخچایا ای وای دئدیک قورددی، قیتدیک قاشدیق، هیچ بیلمه دیک نه وقت گدیکدن آشدیق. حیدر بابا، آغاجلارون اوجالدی، اما، حیف، جوانلارین قوجالدی! توخلیلارین آریخلیوب، آجالدی! کولگه دوندی، گون باتدی، قاش قرلدی! قوردون گوزی قارانلیقدا برلدی! اشیتمیشم، یانیر آللاه چراغی، دایر اولوب مسجدزون بولاغی. راحت اولوب کندین ائوی ـ اوشاغی، منصور خانین الی ـ قولی وار اولسون، هاردا قالسا، آللاه اونا یار اولسون! حیدر بابا، ملا ابراهیم وار، یا یوخ؟ مکتب آچار، اوخور اوشاقلار، یا یوخ؟ خرمن اوستی مکتبی باغلار، یا یوخ؟ مندن آخوندا یتیررسن سلام ادبلی بیر سلام مالا کلام. خجه سلطان عمه گئدیب تبریزه، اما نه تبریز که ، گلممیر بیزه . بالام، دورون قویاخ گئداخ ائممیزه ؛ آقا اولدی، تفاقمیز داغیلدی، قویون او لان، یاد گئدوبن ساغیلدی. حیدر بابا، دنیا یالان دنیا دی، سلیماندان، نوحدان قالان دنیا دی، اوغول دوغان، درده سالان دنیادی هر کیمسیه هر نه وئریب، آلیبدی، افلاطوندان بیر قوری آد قالیبدی. حیدر بابا، یارـ یولداشلار دوندولر، بیر ـ بیر منی چولده قویوب، چوندولر، چشمه لریم، چراغلاریم، سوندولر. یامان یئرده گون دوندی، آخشام اولدی! دنیا منه خرابه ی شام اولدی! عم اوغلینان گئدن گئجه قیپچاغا، آی که چیخدی، آتلار گلدی اویناغا؛ دیرماشیردیق داغدان، آشیردیق داغا. مش ممی خان گوی آتینی اوناتدی، تفنگنی آشیردی، شاققیلداتدی. حیدر بابا، قره گولون دره سی خشگنابین یولی، بندی، بره سی؛ اورادا دوشه ر چیل کهلیگین فره سی اوردان گئچر یوردوموزون ئوزونه بیزده گئچک یوردوموزون سوزونه. خشگنابی یامان گونه کیم سالیب؟ سید لردن کیم قیریلیب، کیم قالیب؟ آ میر غفار دام ـ داشینی کیم آلیب؟ بولاخ گنه گلیب، گولی دولدورور؟ یا قورویوب، باخچالاری سولدورور؟ آ میر غفار، سید لرین تاجیدی؛ شاهلار شکار اتمه سی قیقاجی دی. مرده ـ شیرین، نامرده چوخ آجیدی. مظلوملارین حقی اوسته اسردی. ظالملری قلیش تکین کسردی. میر مصطفی دایی، اوجا بوی بابا؛ هیکللی، ساققاللی، تولستوی بابا. ایلردی یاس مجلسینی، توی بابا خشگنابین آبروسی، اردمی، مسجدلرین، مجلسلرین گور کمی. مجد السادات، گولردی باغلار کیمی. گورولداردی، بولوتلی داغلار کیمی، سوز، آغزیندا، اریردی یاغلار کیمی؛ آلنی آچیق، یاخشی درین قاناردی، یاشیل گوزلر، چراغ تکین، یاناردی. منیم آتام، سفره لی بیر کیشیدی، ائل الیندن دوتماق اونون ایشیدی. گوزللرین آخره قالمیشیدی، اوندان سورا دونر گه لر دوندولر، محبتین چراخلاری سوندولر. میر صالحین ده لی سولیق اتمه سی، میر عزیزین شیرین شاخسی گتمه سی، میر ممدین قورولماسی، بیتمه سی، ایندی دئسک، احوالاتدی، ناغیلدی، گچدی، گئتدی، ایتدی، باتدی، داغیلدی. میر عبدلون آینادا قاش یاخماسی، جو جیلریندن، قاشینون آخماسی، بویلانماسی، دام ـ دوواردان باخماسی، شاه عباسین دوربینی، یادش بخیر! خشگنابین خوش گونی، یادش بخیر! ستاره عمه نزیکلری یاپاردی، میر قادر ده هر دم بیرین قاپاردی، قاپوپ ییوب، دایچاتکین چاپاردی، گولمه لیدی اونون نزیک قاپپاسی، عمه مین ده، ارسیننون شاپپاسی. حیدر بابا، آ میر حیدر نینیور؟ یقین گنه سماورای قینیور؟ دای قوجالیب، آلت انگینه ن چینیور، قولاخ باتیب، گوزی گیریب قاشینا، یازیق عمه، هاوا گلیب باشینا! خانم عمه ، میر عبدلون سوزونی ائشیدنده، ایه ر آغزی ـ گوزونی، ملکامدا وئرر اونون ئوزونی، دعوالارین شوخلوغیلان قاتاللار، اتی ییوب، باشی آتوب یاتاللار. فضه خانم، خشگنابین گلییدی، آ میر یحیی، عمقزینون قولییدی، رخساره، آرتیستییدی، سوگلییدی، سید حسین میر صالحی یانسیلار، آ میر جعفر غیرتلیدیر قان سالار. سحر تئزدن، ناخیر چیلار گلردی، قویون ـ قوزی، دام باجادا ملردی، عمه جانیم کورپه لرین بلردی، تندیر لرین قاوزاناردی توستوسی، چورکلرین، گوزل اییی ـ ایستیسی، گویر چینلر، دسته قالخیب اوچاللار، گون ساچاندا، قیزیل پرده آچاللار! قیزیل پرده آچیب، ییغیب، قاچاللار، گون اوجالیب، آرتار داغین جلالی، طبیعتین جوانلانار جمالی. حیدر بابا قارلی داغلار آشاندا، گئجه کروان یولون آشیب چاشاندا، من هارداسام، تهراندا یا کاشاندا اوزاقلاردان، گوزوم سئچر وانلاری، خیال گلیب، آشیب گئچر اونلاری. بیر چیخیدیم دام قیه نین داشینا، بیر باخیدیم گچمیشینه، یاشینا، من ده اونون قارلاریلان آغلاردیم، قیش دوندوران اورکلری داغلاردیم. حیدر بابا، گل غنچه سی خنداندی اما، حیف، اورک غذاسی قاندی، زندگانلیق بیر قارانلیق زنداندی، بیر گوریدیم نه لر گلیپ باشینا؟ بو زندانین دربچه سین آچان یوخ! بو دارلیقدان بیر قورتولوب قاچان یوخ! حیدر بابا، گویلر بوتون دوماندی، گونلریمیز بیر ـ بیریندن یاماندی، بیر ـ بیروزدن آیریلمایون، آماندی! یاخشیلیغی المیزدن آلیبلار! یاخشی بیزی یامان گونه سالوبلار! بیر سوروشون بو قارقینمش فلکدن، نه ایستیور، بو قوردوغی کلکدن، دینه، گچیرت اولدوزلاری الکدن، قوی توکولسون، بو یئر یوزی داغیلسین، بو شیطانلیق قور قوسی بیر یغیلسین! بیر اوچیدیم بو چرپینان یئلینن، باغلاشیدیم داغدان آشان سئلینن، آغلاشیدیم اوزاق دوشن ائلینن، بیر گوریدیم آیریلیغی کیم سالدی! اولکه میزده کیم قیریلدی، کیم قالدی! من سنون تک داغا سالدیم نفسی، سن ده قیتر، گویلره سال بو سسی، بایقوشون دا دار اولماسین قفسی؛ بوردا بیر شیر داردا قالیب باغیریر، مروتسیز انسانلاری چاغیریر! حیدر بابا، غیرت قانون قاینار کن، قره قوشلار سنن قویوپ قالخار کن، اوسیلدیریم داشلارینان اوینار کن، قوزان منیم همتمی اوردا گور، اوردان اییل، قامتمی داردا گور! حیدر بابا، گئجه دورنا گئچنده، کور اوغلونون گوزی قارا سئچنده، قیر آتینی مینوب، کسیب، بیچنده، من ده بوردان تئز مطلبه چاتمارام! عیوض گلیب چاتمیونجان، یاتمارام! حیدر بابا، مرد اوغوللار دوغگینان، نامرد لرین بورونلارین اووگینان گدیکلرده قورد لاری توت بوغگینان، قوی قوزولار آیین ـ شایین اوتلاسین، قیونلارون قویروقلارین قاتلاسین! حیدر بابا، سنون گویلون شاد اولسون! دنیا وار کن، آغزون دولی داد اولسون! سنن گئچن تانیش اولسون، یاد اولسون، دینه: منیم شاعر اوغلوم شهریار بیر عمر دور غم اوستونه غم قالار! |
|
+ نوشته شده در
چهارشنبه هفتم آذر 1386ساعت 19:49 توسط خوی سون |
|
|
صفحه نخست پست الکترونیک آرشیو عناوین مطالب وبلاگ |
| درباره وبلاگ |
دارالصفای خوی... شهری که آرامگاه ابدی شمس تبریزی است ... شهری که پوریای ولی این شیر مرد تاریخ در آن خفته است... شهری که آیت الله خویی ها ،فاضلی ها مرقاتی ها،آقاسی ها ، حاتم خان ها ودنبلی ها ،ملا علی وملا حسن وملا احمد ها ، سید مقبره ها وشیخ نوایی ها وزریاب ها و جوانشیرها و ریاحی ها و هنرور ها وکوچری ها و هزاران سردار شهید پرورده...هزاران هزار مردان نام آور که...در جای جای این کره خاکی بودند و هستند وخواهند بود...
شهری که در تورات از آن یاد شده ... شهری که هخامنشها از آن به عظمت یاد کرده اند... شهری که درلحظه لحظه های افتخارو غرور این سرزمین نامی درخشان دارد ...دیار عاشقان خدا...دارالمومنین...و شهری که جای جایش مهد علم و ادب و عرفان است... واکنون در انتظار برآورده شدن خواست دیرین و بحق مردمش ، نیازمند توجه و همت والای شما فرزندان غیور و متعهد خویش است....دست یاری به هم دهیم و در آبادانیش بکوشیم...افتخار ما تمدن بی همتا و ۶۰۰۰ ساله خوی واميد ما باز گرداندن شکوه وعظمت مجدد وبرحق خوی در سايه ايرانی قوی ومقتدراست .اوجالسین خوی آدی... آبادلانسین ...حاققینا یئتیرسین خویوموز |
| نوشته های پیشین |
|
اسفند 1387 آذر 1387 آبان 1387 مهر 1387 تیر 1387 اردیبهشت 1387 اسفند 1386 دی 1386 آذر 1386 آبان 1386 مهر 1386 شهریور 1386 مرداد 1386 تیر 1386 خرداد 1386 اردیبهشت 1386 اردیبهشت 1385 |
|
RSS
|