خوی گرک اوستان اولا، آباد اولا
ائرمنی دعواسین گوروب گئدنلر
اوچ گئجه گوندوزی دوام ائدنلر
هاردا قالوبدی قالالار، بدنلر
دادلی اولار خویلولارین دووزلاری
آدلانیب دیر نجابتده قئزلاری
"شمسه" یاتاق محلله نین توپراقی
پیرولی دیر "پوریانین" اوتراقی
فایتونچی لار اوینادیللار ماتراقی
دادلی اولار خویلولارین دوزلاری
تیتره ده جاق دیشله ریوی بووزلاری
اورینه باخ اولدوزلاردان باج آلئر
چیلله خانا اودلا باشا تاج سالئر
دونیا بویی مطللیب دن آد قالئر
غیرتلی دیر خویلولارین قیزلاری
دادلی اولار دووزلاری هم بووزلاری
خویدی شهید بسله ین اوغلان دوغان
اولکه میزده اصلان اولوب آت قووان
تولکولری مرزه یئتنده بوغان
غیرتلی دیر اوغلانلاری، قئزلاری
سفره لره زینت اولار دوزلاری
مین لن آرتیق مسجد تیکیب خویلولار
دشمن لرین بئلین بوکوب خویلولار
عاشیق لیقه یاخشی قرار قویدولار
سرین اولار خویلولارین بوزلاری
آمما یوخدو اللرینین دووزلاری
کتلر اولوب شه هر، شه هر لر اوستان
باغلار تمام گوللی چیچک گولستان
آمما حئییف خوی قالوبدی دبستان
اریسده خویلولارین بوزلاری
یئرده قالوب خویلولارین دوزلاری
گلین بیزده خویی ماراخلاندیراق
زولف لرین یاخشی داراخلاندیراق
اولکه میزده بیزده چیراغ یاندیراق
خویلولارین پنیر، چورک دووزلاری
یاندیراجاق والله ایمانسیزلاری
خوی گرک اوستان اولا آباد اولا
درد و غم و غصه دن آزاد اولا
بعله دئیین خویلی دا دلشاد اولا
خویلولارین دوزلاری وار دوزلاری
شهامتلی اوغلانلاری قئزلاری
